Avatar - Movie of the Decade

今日特登揸咗半個鐘頭車去咗一間3D戲院睇好評如潮嘅 Avatar，果然大開眼界。套電影成三個小時長，加埋我哋提早半個鐘頭入場霸位 (因為坐得太前睇3D會好辛苦)，同埋啲預告片，足足坐係戲院成四粒鐘。但係都喺扺嘅。

點好睇？真係講唔出。要你親身經歷至感受得到。套片會帶你進入一個高度幻想嘅世界，係你以前只會喺夢境中見過，而家以高科技加埋電影藝術，詡詡如生咁出現喺面前。重有一個驚險嘅保護家園故事，加埋環保主題，唔怪得完場時有觀眾拍掌。James Cameron 上一套 Titanic 同埋而家嘅 Avatar ，最成功就係運用電影科技提供高質素娛樂之外，重能夠觸動到觀眾一啲心底嘅共通情感，上次係愛情，今次係咩？自己睇吓咪知囉。

呢套戲會係3D電影嘅經典，所以記住睇3D，唔係浪費咗套戲。

而家覺得有少少恐怖嘅樣，完場時你竟然會喜歡佢，你話導演係咪好叻。

百二蚊港幣，或者十五蚊加幣，真係物超所值。

 

就係呢副3D眼鏡，幫你進入夢幻世界。

平安夜大餐

今年平安夜去完教會，突然心血來潮想食日本嘢。聽到話黃金商場有間日本餐廳，即管碰下運氣。去到發現係香港式嘅日式自助餐，期望己經降低咗。望入去又好似幾多人，卒之決定試吓。不過價錢都唔平，唸住今次都係蝕水啦，因為我哋食量不大，Scott仔更加唔使講。點知啲嘢食出乎意料咁啱食，雖然唔係好好味，不過就啱我哋啲口胃。結果食咗成兩個鐘先走，連 last order 都唔放過。

都係啲大路魚生壽司之類，味道一般。

 

反為啲熟食就幾多種類，重有啲蝦蟹等香口嘢。甜品水果雪糕都好味。

佢食得重多過我，所有啲三文魚生，一到就俾佢掃清。

Merry Christmas

Merry Christmas & Happy New Year!

再世貓王？

秋天時去咗一個類似香港工展會嘅 Markham Fair，有好多農業產品加埋一啲大路貨品例如工藝品、厨具用品，并且有啲綜藝表演等。

最特別係見到一個唔知喺機械人定係真人嘅貓王。呢隻嘢郁起上嚟好似機器，但最盞鬼就係識同人握手，俾大家睇吓啦。


究竟係機械人定係真人呢？

The Sound of Music

十月三十一日晚，正好係Hallowen晚上，一家人同朋友到市中心睇 The Sound of Music。我同Michelle係香港時己經睇過，不過啲musical好睇嘅睇多幾次都冇咩所謂，況且Scott仔都未曾睇過。喺多倫多睇musical都算平，加上係季尾(即係就嚟做完)，只係50蚊張飛，仲係大堂正中，都咪話唔抵睇。

據我哋睇過兩次嘅意見，呢度嘅 cast 強啲，佈景道具亦勝一籌。

呢間叫 Princess of Wales Theater，係呢度有名專做musical嘅劇院。應該係Princess Diana開幕啩。

未睇先興奮。

間戲院都幾靚架。

睇咩戲話？

換雪軚

冬天己到，又到換雪軚時間。第一年剛到埗時未知驚，用番套 all season types 捱過一個寒冬，驚險百出。試過喺燈位前停唔到車，又試過轉彎時好似溜冰咁。舊年終於買咗套軚。起碼心安啲啦。

剛換完軚後都幾肉孫，因為連rim都換埋。

喺超市買個cover套上去，即刻靚晒。

套舊軚唯有擺喺basement啦。

豬流感最新戰報

Scott仔燒咗兩日後退燒，雖然開始咳嗽，但精神唔錯。唸住都應該好番，點知再過多日，朝早起身又燒到一百零二度，啲咳重轉為乾咳。不妙！馬上帶佢去睇醫生。今次輪到一位女醫生。但見佢做足防禦措施，著到好似SARS時董太咁。一路好小心咁聽Scott仔嘅肺，一路話俾我哋聽佢嗰女都中咗招，演變成肺炎，正在康復中。又話嗰個不幸去世嘅十三歲小朋友都係死于肺炎。聽咗好耐，卒之話有雜聲，可能係肺炎，要食抗生素。又話如果兩日後仲未退燒，就要馬上返去。

結果Scott仔連續十日食抗生素，開頭幾日成個人散哂，無哂精神，成日瞓覺。好在而家己經完全康復。尋日仲去咗踢波。總算又過一關。

H1N1

H1N1喺大多倫多地區引起好多争議，主要係大家有啲恐慌，疫苗又唔夠。政府啲安排又唔係咁理想。如果喺香港，啲傳媒一定日日係咁鬧，呢度都有鬧，不過相對就溫和好多。

啲菌係社區都傳得好快。連Scott仔都中咗招。前日星期五放學返嚟就發高燒，成一百零二度，食Tynenol (香港叫Panadol) 都退唔到燒，第二朝馬上去睇醫生，話應該係感染到H1N1。不過呢度就唔會俾任何藥，只係要你喺屋企休息。昨日成日都係百零一二度上落，又有喉嚨痛同少少咳嗽。都幾疲倦，不過重可以彈琴踢波同睇電視 (睇咗成兩場英超)。今朝起身就好似退咗少少燒，不過啲咳同傷風就多咗。希望快啲好番啦。


我哋一家都應該係帶菌者，所以冇咩事就唔好見面住啦。

我哋在家嘅現場實境。

Halloween

遲咗一星期，先俾大家睇吓呢度啲Halloween佈置。絕大部份人都當Halloween係一個Fun festival。啲裝飾都係搞笑為主，間唔中會有啲恐怖嘢。睇吓相先啦。

好多屋門口都放咗南瓜，有真有假。

呢間屋加咗啲恐怖嘢。

呢度掛咗好多裝飾喎，行埋去睇睇。

嘩！都幾恐怖喎。

哎呀！手同腳各一。唔知basement重有冇收埋更多。

順帶一提，無論小朋友同大人，喺呢日都鍾意扮到鬼五馬六。Scott返學見到一個同學戴個爆炸裝假髮，同埋條Mike Tyson嘅金腰帶，笑到佢透唔到氣。夜晚去downtown見到成街人都扮鬼扮馬去party。我唸同蘭桂坊差唔多。

紅葉處處

今次同大家睇多幾張秋天紅葉相。批相係兩三個星期前影嘅，而家嘅景象己經完全唔同晒。特別喺過去幾日，啲樹葉就係咁落，而家己經差唔多落晒。加拿大嘅秋葉，就好似日本三四月嘅櫻花一樣，稍縱即逝。

紅橙黃綠都有齊哂。

普通街道都紅葉處處。

呢棵火紅色嘅樹真係好靚。

呢條街係有名嘅Unionville區，啲櫥樹木自然靚啲。

唔知你信唔信，而家呢棵樹竟然變番綠色。

Apple Picking Trip

呢度每年到十月份都係摘蘋果嘅好日子。好多果園就趁機搞吓開放日，等啲家庭嚟開開心心摘吓蘋果順便玩一個週末。今年我哋就同埋另外幾個家庭揸咗個幾鐘頭車去到一個頗有規模嘅果園。都幾好玩，特別啲細路，都玩到依依不捨。

 

一入去就撘呢啲馬車，或者係拖拉機拖嘅車去到唔同嘅果樹林摘蘋果。

果樹林就係咁根據唔同品種嘅蘋果排列，你可以按自己喜好選擇，不過有唔同價錢。

 

樹上真係滿佈果實，任摘唔嬲。

 

睇吓幾開心！

收穫都唔錯。

釣大魚

有次去一個郊野公園，咁啱見到好多人釣魚。唔係泥錳魚仔，喺真真正正嘅大魚呀。睇吓！

今個夏天另一個成功嘅PROJECT

除咗油車房外，今年夏天重有一個大project，就係同屋企嘅前園整容。即係鋪吓路、砌吓石、種吓樹木同花卉之類。當然我哋無咁嘅技術同知識，唯有搵 contractor, 俾啲錢人使下。整出嚟嘅效果都唔錯。值得一提嘅係，今次係Michelle做project manager，即係佢負責督工同鬧人。而家睇吓啲成果先啦。

Vancouver Island 之旅 (之二)

Victoria有條村，所有屋都係浮喺水上面，十足十好似香港大澳咁。都唔平噃，有一間丟空咗正在出售，開價都成四五十萬。不過周圍啲景都唔錯，有幅好靚嘅維多利亞海景。

呢啲就係企理嘅水上屋。

成條村都係咁。

之後又去到天文台山睇星星，呢度有支天文望遠鏡好勁，可以望到好遠，好多星座。

1918年就己經啟用。

Scott仔呢期最鍾愛天文同星座，當然非常雀躍。拍埋支telescope度就知呢支嘢有幾高，有成七八層樓咁高架。

喺天文台山望出去，唔使問都係靚絕啦。

又到秋天

大自然嘅時鐘確實準確，一到九月中周圍啲樹木就開始轉顏色，紅嘅黃嘅橙嘅都有。而家就俾大家睇吓我地屋企附近啲植物。

屋企對面棵樹轉咗橙色。

自己門口棵樹就轉咗紅色。

周圍街道都顏色鮮艷。

呢一行樹全變成紅色。

Vancouver Island 之旅 (之一)

其實暑假除咗去Calgary外重自己揸車去溫哥華島。雖然只係短短三日，但係都幾好玩。自由自在咁揸住架車呢到去嗰到去確實係一種享受。

就係租咗呢架車，以咁嘅價錢質素都算okay喇。

呢間專賣聖誕物品嘅商店都幾多嘢睇，不過價錢就略貴。

參觀咗間有好多模型嘅 museum，算係一個驚喜。有好多精心制作嘅戰爭及城市場面，彷真程度都幾高。

呢個頹垣敗瓦嘅城市景，有七八分似。

Victoria 最殺食嘅就喺呢啲靚景色。

Scott 仔捧盃

今個暑假幇Scott仔參加咗足球隊，估唔到好有規模。由六月起毎星期都有一日練習、一日比賽。如是者十幾場比賽後，佢個隊都勝多負少，亦越來越有進步。

喺剛過去嘅星期六和日，有兩日Playoff比賽。佢嗰組係八歲以下，共有八隊，分為兩組。分組賽三埸兩勝一和，順利出線。跟住噝semi-final亦以三比零大勝，可惜在決賽以零比一敗北，只能屈居亞軍。不過都己經係人生一段美好回憶。而家俾大家到現場睇睇。

都似模似樣噃。

媽咪都有份。

班隊員由唔識踢到略有台型、合作和隊型，中間都付出唔少，包括教練同班家長。